उतार

आता उतार सुरू
किती छान
चढणे ही भानगड नाही
कुठलं शिखर जिंकायचं नाही
आता नुस्ता उतार
समोरचं,झाडीनं गच्च भरलेलं द्रुश्य
दरीतून अंगावर येणारा
आल्हाददायक वारा
कधी धुकं, तर कधी ढगही
टेकावं वाटलं तर टेकावं
एखाद्या दगडावर
बसलेल्या छोट्या पक्ष्याशी
गप्पा माराव्यात,
सुरात सूर मिसळून...
अरे, हे सगळं इथंच होतं?
मग हे चढताना का नाही दिसलं?
पण असू दे
आता तर दिसतंय ना
मजेत बघत
उतरू हळूहळू
मस्त मस्त उतार

अनिल अवचट